Burladór sira sei halo buat hotu atu konvense ita katak riku-soin hein ita se ita tuir sira-nia instrusaun.
Karik sira apresenta ita ba burladór daruak ka datoluk – ne'ebé finje hanesan funsionáriu banku, reprezentante kanál TV ka funsionáriu governu.
Burla balu ne'ebé baibain mak:
a) Koko atu hetan ita-nia informasaun pesoál
Burladór sira uza maneira oioin atu na'ok detalle pesoál. Bainhira sira hetan ona, sira bele uza identidade ne'ebé na'ok ne'e atu halo fraude.
b) Finje hanesan banku/organizasaun
Burladór sira bele finje hanesan organizasaun loloos, hanesan banku. Téknika ne'ebé baibain mak dehan katak ita-nia “kartaun ATM bloke ona” no ita tenke telefone ba númeru ida (iha mensajen) atu loke fali ATM.
Téknika seluk mak burladór sira finje hanesan reprezentante ANC no husu osan ho razaun rejistu no/ka lisensiamentu.
c) Ameasa no estorsaun
Burladór sira koko na'ok identidade ka osan – to'o ameasa ema nia moris ne'ebé sira telefone.
d) Transferénsia osan / “Haruka kódigu ida”
Burladór sira inventa razaun ne'ebé konvense no hanesan legítimu atu halo ema sente seguru. Ezemplu: téknika ida ne'ebé populár mak haruka mensajen dehan katak sira transfere osan sala ba ita-nia konta no husu ita haruka fali “kódigu” ka “mensajen” ida ba sira.
e) Burla prémiu/lotaria
Burladór sira bosok ita atu fó osan ka informasaun pesoál hodi simu prémiu husi lotaria ka konkursu ne'ebé ita nunka partisipa. Burladór sira-ne'e baibain finje hanesan programa konkursu TV ne'ebé populár.
