Esperiénsia internasionál hatudu katak kresimentu no dezenvolvimentu telekomunikasaun sai di'ak liu iha merkadu ida ne'ebé iha kompetisaun. Rezultadu kompetisaun mak servisu oioin ne'ebé to'o ba populasaun barak liu, ho kustu ki'ik liu, kualidade di'ak liu no apoiu ba kliente ne'ebé responde di'ak liu ba uzuáriu sira-nia nesesidade. Ho rekoñesimentu kona-ba importánsia merkadu telekomunikasaun ho kompetisaun ba futuru sosiál no ekonómiku Timor-Leste nian, Governu hahú prosesu ida atu liberaliza merkadu telekomunikasaun no introdús kompetisaun efetiva liuhusi partisipasaun setór privadu. Hanesan parte husi prosesu ne'e, Governu estabelese kuadru legál foun ida ba telekomunikasaun no harii autoridade nasionál komunikasaun foun ida ho funsaun, dever no podér ne'ebé presiza atu garante ninia implementasaun.
Objetivu Dekretu-Lei ida-ne'e mak promove bem-estar sosiál no ekonómiku ba tempu naruk ba populasaun Timor-Leste, hodi garante disponibilidade, presu ne'ebé asesível no kualidade servisu telekomunikasaun liuhusi:
Estabelese no mantein rejime regulatóriu telekomunikasaun ida ne'ebé nakloke, la diskrimina, neutru ba teknolojia, objetivu, transparente no proporsionál;
Promove kompetisaun efetiva no justu entre fornesedór servisu sira;
Garante uzu efisiente ba rekursu limitadu ne'ebé presiza ba telekomunikasaun; no
Enkoraja investimentu iha, no uzu efisiente ba, infraestrutura ne'ebé uza atu fornese servisu telekomunikasaun.
Klik iha ne'e atu haree:
Dekretu-Lei n.º 15/2012, loron 28 Marsu 2012, kona-ba Regulamentasaun Setór Telekomunikasaun
