Se ita konsumidór telekomunikasaun, keixa saida de'it mak ita bele iha?
Ita-nia keixa bele kona-ba servisu ne'ebé operadór telekomunikasaun sira fornese no ninia infraestrutura. Keixa sira bele inklui:
- Fornesimentu servisu (ativasaun / restaurasaun / taka);
- Kualidade servisu (interrupsaun / falla iha servisu, kualidade ladi'ak);
- Asuntu kona-ba fatura (kobra liu, dedusaun la justifika / tarifa);
- Uza servisu ho abuzu (telefone/SMS ne'ebé ofende, la husu no fraudulentu);
- Prátika ilegál (transferénsia ilegál koneksaun/propriedade, emisaun SIM / SIM duplikadu, etc.);
- Problema verifikasaun (informasaun uzuáriu, uza ilegál identifikasaun, emisaun SIM barak ho identifikasaun hanesan);
- Atendimentu kliente ladi'ak (rezolusaun keixa / liña apoiu);
- Informasaun bosok (reklame bosok, subar faktu kona-ba servisu no tarifa, etc.);
- La iha servisu iha área ida (problema kobertura);
- Servisu ho valór aumentadu (GPRS, pakote);
- Falla iha servisu;
- Hasai servisu.
Se ita iha keixa, ita tenke halo saida?
- Ita tenke kontaktu ita-nia fornesedór servisu.
Oinsá mak ita bele hato'o keixa ba fornesedór servisu?
Favór haree Lista Operadór atu hetan kontaktu operadór/fornesedór servisu sira no hatene oinsá hato'o keixa (www.anc.tl/list-of-operatos/).
Rekizitu atu hato'o keixa ba fornesedór servisu?
Fornesedór servisu bele husu informasaun tuir mai bainhira ita hato'o keixa
- Ita-nia naran, kontaktu no detalle keixa.
Informasaun saida mak ita tenke husu ba fornesedór servisu bainhira hato'o keixa?
- Númeru referénsia keixa;
- Númeru konta konsumidór;
- Prazu rezolusaun keixa;
- Dalan atu kontinua se keixa la rezolve iha prazu ne'ebé fó sai.
Se operadór la rezolve ita-nia keixa, ita bele halo saida?
- Ita bele kontaktu ANC atu rezolve ita-nia keixa.
Oinsá mak ita bele hato'o keixa ba ANC?
Iha Unidade Protesaun Konsumidór, sede ANC iha Díli.
- Download, prense no entrega “Formuláriu Keixa Konsumidór” rasik ka liuhusi email ba: consumerprotection@anc.tl.
Informasaun saida mak presiza atu hato'o keixa ba ANC?
Informasaun tuir mai obrigatóriu molok ANC simu keixa.
- Naran no kontaktu ema ne'ebé halo keixa;
- Númeru referénsia keixa no númeru konta konsumidór ne'ebé fornesedór servisu fó;
- Data hato'o keixa ba operadór / remata prazu ne'ebé fornesedór servisu fó atu rezolve keixa;
- Deskrisaun badak kona-ba keixa.
Informasaun saida mak ita tenke husu ba ANC?
- Númeru rejistu keixa;
- ANC sei informa ita kona-ba prazu rezolusaun / estadu ita-nia keixa.
Keixa tipu saida mak la'ós ANC nia kompeténsia?
- Keixa kona-ba asuntu internu rekursu umanu iha operadór sira;
- Keixa kona-ba akordu komersiál entre operadór no parte terseiru, ezemplu frankia ka revendedór kartaun;
- Keixa kona-ba instalasaun torre telekomunikasaun móvel.
