Iha loron 26 Marsu 2019, S.E. José Agustinho da Silva, Ministru Transporte no Komunikasaun, lansa Dijitu Identifikasaun Marítima (MID) Timor-Leste nian iha eventu ida iha Díli. Ministru hatete nia kontente ho atribuisaun MID 550 ba Timor-Leste husi União Internasionál Telekomunikasaun (ITU) iha loron 4 Marsu 2019.
"Ho MID ne'e, ba dala uluk iha istória ita-nia nasaun, Ministériu Transporte no Komunikasaun liuhusi Autoridade Nasionál Komunikasaun bele fó Identidade Servisu Móvel Marítimu (MMSI) ba estasaun ró, aviaun buka no salva (SAR) no estasaun kosta. Ho MMSI, ita-nia ró no aviaun bele uza sistema komunikasaun emerjénsia modernu hanesan Digital Selective Calling (DSC) no Automatic Identification System (AIS). Ida-ne'e sei lori seguransa di'ak liu ba pasajeiru no tripulante sira, inklui sira ne'ebé uza ró Berlin Nakroma", Ministru hatete.
