Atu informa públiku kona-ba atividade ANC nian tuir ninia responsabilidade no papél nu'udar regulador setór komunikasaun, ANC publika iha pájina ne'e rezumu eventu sira ho foto no deskrisaun badak.
20-22/03/2023, Sydney, Austrália – Regulador tékniku júniór ANC, Sr. Renato Hildebrand da Costa, partisipa iha Simpóziu Seguransa Sibernétika Sistema Transporte Marítimu Globál (GMTSC) 2023, ne'ebé organiza husi Governu Austrália hamutuk ho Dinamarka, Olanda, Singapura, Reinu Unidu no Estadus Unidus, membru Parseria Internasionál ba Seguransa Sibernétika Marítima. Objetivu mak atu halibur governu, akademia no indústria atu diskute seguransa sibernétika no hasa'e reziliénsia sibernétika iha setór marítimu.
13-17/03/2023, Genebra, Suiça. Delegasaun Timor-Leste ne'ebé mak lidera husi S.E. Ministru Transporte no Komunikasaun, Sr. José Agustinho da Silva, partisipa iha World Summit on the Information Society (WSIS) Forum 2023 no sesqun espesializada sira inkluindu "High-Level Policy Session 5: Bridging Digital Divided" no "WSIS 2023 Ministerial Roundtable".
17/03/2023, CBD1-Timor Plaza, Diretur Tékniku Sr. Vidal dos Santos Gomes hamutuk ho CEO Telemor Sr. Trang Van Bang no akompaña husi CEO Metrolink Sr. José Januario, reprezentante BNCTL, reprezentante Jape Group, kliente telemor nomos parseiru sira seluk halo lansamentu ba loja foun telemor nian atu kliente sira husi telemor bele halo tranzasaun oioin hanesan sosa sim card, telemovel no seluk tan.
10/03/2023, Diretur Tékniku Regulador ANC Sr. Vidal dos Santo Gomes reprezenta Presidente ANC hodi akompaña S.E Ministru Interinu MTC Sr. Abel Pires da Silva halo lansamentu ba torre foun telemor CO0017 iha Aldeia Aitoun, Suku Fatululik, Postu Administrativu Fatululik, Munísipiu Covalima hodi ajuda komunidade sira bele asesu ba liña telekomunikasaun.
27 Fev. – 03 Mar. 2023, ANC – Regulador tékniku ANC Sr. Fábio de Magalhães no Sr. Renato H. da Costa partisipa iha formasaun online kona-ba Forénsika Komputadór ne'ebé organiza husi Universitas Indonesia (UI) no Ajénsia Kooperasaun Internasionál Japaun (JICA). Kursu ne'e hanorin oinsá harii kapasidade forénsika internu ho ferramenta gratuitu no open-source oioin, atu identifika no trata evidénsia dijitál no responde ba pergunta krítiku (ezekusaun aplikasaun, asesu file, na'ok dadus, uza dispozitivu esterna, download file, tékniku anti-forénsika), halo triajen, analiza sistema ne'ebé la'o hela no tékniku rekolla seluk, no prepara relatóriu no aprezenta rezultadu.
17/02/2023, Ainaro - ANC hamutuk ho Asosiasaun TANE KOMSUMIDOR sosializa knár no responsabalidade ANC tuir dekretu lei Nú. 15/2012, nomos direitu konsumidor sira nian iha servisu telekomunikasaun. Objetivu husi sosializasaun ne’e atu hato’o informasaun nesesariu hodi tulun populasaun Timor-Leste uainhira utiliza servisu telekomunikasaun. Partisipa iha sosializasaun ne’e mai husi Administrador Munísipiu, Administrador Postu, Xefe Suku, Xefe Juventude, ema ho defisiensia, sosiedade sivil, Estudante, reprezentante operador Timor Telecom, Telkomcel, Telemor no reprezentante MTC, iha Salaun Administrasaun Munísipiu Ainaro.
16/02/2023, Ainaro – Ekipa Autoridade Nacional de Comunicações (ANC) kompostu husi Diretór Tékniku Regulador Sr. Vidal dos Santos Gomes, Kordenador Protesaun Konsumidor Sr. Nazário Jerónimo, Tékniku Regulador Eng. Pio.C.T. Soares halo talk show iha Radio Komunidade Lian Tatamailau Ainaro kona ba knár no responsabilidade ANC tuir dekretu lei Nú.15/2012, 28 Marsu, ho objetivu atu partilla informasaun ba komunidade sira iha área remotas ne’ebé durante ne’e utiliza servisu telekomunikasaun.
07-09/02/2023, Maubara Room - Timor Plaza, Diretór Tékniku Sr. Vidal dos Santos Gomes ho Tékniku Regulador Profesional ANC Eng. Fábio de Magalhães, partisipa iha Capacity Building Programme (CBP) durante loron tolu ne'ebe lidera husi sekretariadu ASEAN ho apoiu husi ADB, programa kapasitasaun ne’e hahu sessaun primeiru ho pilar ekonómiku no tuir mak sosial, politika no kultura, atu Timor-Leste bele prepara an didiak hanesan membru ba iha ASEAN.
07/02/2023, Salaun MTK, Caicoli, Presidente ANC Sr. João Olívio Freitas akompaña husi Diretór Servisu Korporativu Sr. Julião Soares dos Reis, partisipa Lansamentu ba Implementasaun hodi dezenvolve no perguntas asuntu defisiensia ba ezame eskrita kondusaun bazea ba Planu Asaun Nasional – ema ho defisiensia Periodu 2021-2030, Página:62.
27/01/2023, Salaun Nobre, Ministériu Negosiu Estranjeiru no Koperasaun, Diretór Servisu Korporativu ANC Sr. Julião Soares dos Reis partisipa iha sesaun informasaun relasiona ho prosesu adezaun Timor-Leste ba ASEAN. sesaun ne’e atu fahe informasaun atualizadu kona ba progesu adezaun Timor-Leste ba ASEAN iha pilar ekonomia no atualiza Capacity Support Report nomos introduz sesaun Capacity Building Programme sei oferese husi sekretariadu ASEAN, ne’ebé lidera husi Diresaun Jeral Asuntu ASEAN no TradeInvest Timor-Leste.
26/01/2023, Ekipa METROLINK ho MORATELINDO halo aprezentasaun ba regulamentu servisu Internet Service Provider (ISP) ba ezekutivu Autoridade Nacional de Comunicações iha Salaun enkontru ANC, Caicoli.
26/01/2023, Presidente ANC Sr. João Olívio Freitas akompaña husi Diretor Servisu Korporativu Sr. Julião Soares dos Reis, partisipa iha serimonia sertifikasaun operasaun Aeroportu Internacional Presidente Nicolau Lobato, ne’ebé ANATL hala’o iha Aeroporto Internacional Presidente Nicolau Lobato, Comoro.
25/01/2023, Salaun enkontru ANC, Caicoli, Ekipa TradeInvest Timor-Leste hala’o audénsia ho Presidente ANC Sr. João Olívio Freitas ne’ebé akompaña husi Diretór Tékniku Sr. Vidal dos Santos Gomes no Asesor Prinsipal José Lay hodi deskute kona ba futuru projetu investimentu Al-Bader International Development Co.W.L.L iha Timor-Leste, iha enkontru ne’e deskute liu kona ba investimentu iha setor telekomunikasaun nomos lei no regulamentu ne’ebé atu aplika inklui informasaun relevante seluk..
19-20/01/2023, Salaun MTC Caicoli, Presidente ANC Sr. João Olívio Freitas akompaña husi Diretór Tékniku Sr. Vidal dos Santos Gomes, Diretóra Finansa Sra. Georgina E. da S. Garcia no Diretór Servisu Korporativu Sr. Julião Soares dos Reis, partisipa iha sesaun traballu ba aprezentasaun ezekusaun orsamentu 2022 no preparasaun planu ba ezekusaun orsamentu 2023 Ministériu Transporte no Komunikasaun.
11/01/2023, Salaun Enkontru ANC, Associação dos Adventista do Setimo Dia-Timor Leste hala’o enkontru ho Presidente ANC Sr. João Olívio Freitas akompaña husi Diretór Tékniku Sr. Vidal dos Santos Gomes no Diretór Servisu Korporativu Sr. Julião Soares dos Reis hodi informa planu dezenvolvimentu Radio, Televizaun no Social Media Hope Channel Timor Leste nomos relata atividade ne’ebé hala’o ona durante ne’e.
09-10/01/2023, Liquiça-Tibar Water Park, Ministériu Transporte no Komunikasaun halo avaliasaun dezempeñu servisu funsionáriu MTC tinan 2022 hodi atinje objetivu ba dezenvole no mellora kualidade servisu prestadu ba komunidade. Eventu ne’e lidera husi S.E. Ministru Transporte no Komunikasaun Sr. José Agustinho da Silva no partisipa husi diretór nasional, diretór munísipiu, xefi departamentu, xefi seksaun, ajensia autonomu nomos funsionáriu.
21/12/2022, Lauhata, Liquiça, Presidente ANC Sr. João Olívio Freitas akompaña husi Diretór Tékniku Sr. Vidal dos Santos Gomes, partisipa iha Focus Group Discussion Peningkatan Kerja Sama Investasi antara Indonesia dan Timor-Leste, ne’ebé organiza husi Kedutaan Besar Republika Indonesia - Dili, Timor-Leste.
19/12/2022, Palasiu Governu, SECOMS, Presidente ANC Sr. João Olívio Freitas akompaña husi Diretór Tékniku Sr. Vidal Santos Gomes, Diretór Servisu Korporativu Sr. Julião Soares dos Reis, Kordenador Protesaun Konsumidor Sr. Nazário M. Jerónimo, partilla informasaun kona ba papel ANC iha setor telekomunikasaun iha programa MEET THE PRESS, ho topiku: “Atinjimentu governu durante mandatu no programa prioridade ne’ebé sei implementa”, programa ne’e organiza husi Sekretáriu Estadu Komunikasaun Sosiál.
15/12/2022, City8, Manleuana, Ministériu Transporte no Komunikasaun liu husi Autoridade Nacional de Comunicações hamutuk ho parseiru relevante sira hanesan Timor Telecom, Telemor, Telkomcel, Tane Konsumidor no Asosiasaun ICT TL realiza workshop kona-ba ICT no Dezenvolvimentu Nasional. Partisipa iha workshop ne’e mai husi liña ministériu, ajénsia autonomu, PNSIK, PCIC, operador telekomunikasaun no akademia.
22-28/11/2022, Manatuto, Ministériu Transporte no Komunikasaun, liu husi Autoridade Nacional de Comunicações partisipa iha feira nasional hodi komemora loron Proklamasaun Independénsia Repúblika Demokrátika Timor Leste 28 Novembru 2022 ba dala 47 ne’ebé ho tema: Mai ita Hamutuk Kontinua Luta ba Povu nia Moris Diak.
26/07/2022 – 22/11/2022, Okinawa, Japaun – Regulador tékniku ANC Sr. Fábio de Magalhães partisipa iha programa JICA KCCP "ICT Core Personnel Development (C): IT Architect Course" (parte online husi 26 Jullu to'o 28 Setembru 2022 no parte iha Okinawa, Japaun, husi 11 Outubru to'o 21 Novembru 2022). Objetivu mak atu bele analiza problema negósiu/TIK, define rekizitu solusaun TIK no define estrutura sistema TIK.
15-17/11/2022, Lisboa - Portugal, ARCTEL – ANACOM, Diretór Servisu Korporativu ANC Sr. Julião Soares dos Reis ho Kordenador Protesaun Konsumidor Sr. Nazário M. da C. P. Jerónimo partisipa iha eventu grupu traballu kona ba estatístika infografia.
07-11/11/2022, Incheon, Repúblika Koreia – Reguladora tékniku ANC Sra. Hercília Cristela Martins Belo partisipa iha APCICT Digital Leaders Programme, atu hametin rede líder dijitál sira ne'ebé apoia servisu hametin kapasidade institusionál no umana kona-ba teknolojia dijitál ba dezenvolvimentu sustentável iha Ázia.
15-18/11/2022, Salaun Enkontru ANC, Ekipa tékniku ANC partisipa iha training program Konseitu baze, estratéjia Direction Finding no regulasaun fundamentál alokasaun frekuénsia bazeia ba ITU, treinador ba programa ne’e mak Sr. Diaz Simanjuntak nudár especialista ba Radio Monitoring and DF no Monitoring.
28/10/2022, Palácio Presidente, Aitarak Laran, Presidente Repúblika José Ramos Horta hala’o enkontru ho Presidente ANC João Olívio Freitas ne’ebé akompaña mós husi Diretór Tékniku Vidal dos Santos Gomes, Asesor José Lay nomos Diretór Ezekutivu Kacific Hugo Filipe Martins hodi koalia kona ba investimentu empreza Kacific Broadband Satelites husi Singapura no oinsa aselera prosesu lisensamentu spectrum.
17/10/2022, Sala Plenaria Parlamentu Nacional, Prezidente Interinu ANC Sr. Vidal dos Santos Gomes hamutuk ho dirijentes MTK akompaña S.E. Ministru Transporte no Komunikasaun Sr. José Agustinho da Silva, hala’o audénsia publika ho Komisaun C ne’ebé trata asuntu finansa públika, hodi aprezenta ezekusaun orsamentu jerál estadu tinan 2022 no proposta OJE tinan 2023.
17/10/2022, Salaun Konferénsia MTC, Ekipa ANC kompostu husi Diretur servisu korporativu Sr. Julião Soares dos Reis, Diretora Financas Sra. Georgina E. da Silva Garcia, Rekursu Umanu Profesional Sr. Fausto Belo partisipa iha enkontru kona ba funsionariu MTC ba asuntu defisiensia no atitude diak hasoru Ema ho Defisiensia (Planu Asaun Nasional - Ehd Periodu 2021-2030, Página:61), ne’ebé ho sub-tema partilla informasaun no prekupasaun husi ema ho defisiensia kona ba Direitu Asesibilidade ba Asesu Atendimentu Públiku iha MTC.
13/10/2022, Prezidente Interinu ANC Sr. Vidal dos Santos Gomes akompaña husi Diretur Servisu Korporativu Sr. Julião Soares dos Reis, Kordenador Protesaun Konsumidor Sr. Nazário M.da C. P. Jerónimo, Tékniku Regulador Profesional Sr. Pio Clemente T. Soares no Asesor Jurídiku Sr. Adilson Semedo simu vizita kortezia husi ekipa Department of Foreign Affairs and Trade (DFAT-P4i), hanesan departamentu ida ne’ebé promove no proteje interese internasional Australia nian ba apoiu seguransa no properidade. Durante sorumutu parte ANC koalia liu kona ba progresu servisu ANC nian, iha Salaun enkontru ANC, Caicoli.
12/10/2022, Suai Room, Timor Plaza, Prezidente Interinu ANC Sr. Vidal dos Santos Gomes akompaña husi Diretur Servisu Korporativu Sr. Julião Soares dos Reis, partisipa iha aniversáriu media online Hatutan.com ba dala-1 no asinatura Memorandum de Entendementu entre Hatutan.com ho Telkomcel.
11/10/2022, Salaun enkontru komisaun E, Parlamentu Nasional, Autoridade Nacional de Comunicações (ANC), hala’o audénsia publika ho komisaun E asuntu infraestrutura kona-ba apresiasaun inisial Proposta Lei Nú.46/V/ (5a), Orsamentu Jerál Estadu 2023.
04-06/10/2022, Salaun Konferénsia MTC, Caicoli, Autoridade Nacional de Comunicações (ANC) servisu hamutuk ho Asia-Pacific Network Information Centre (APNIC) realiza "Workshop on Internet Routing Timor-Leste" durante loron 3 husi loron 04 – 06 Outubru 2022, ne'ebe partisipa husi instituisaun governu, operador telekomunikasaun, ISP no Akademia.
27/09/2022, Salaun Auditóriu Xanana Gusmão Ministériu Finanças, Diretur Tékniku ANC Sr. Vidal dos Santos Gomes ho Diretur Servisu Korporativus Sr. Julião Soares dos Reis, partisipa iha semináriu nasionál aprezentasaun públika kuadru planeamentu integradu médiu prazu no implementasaun moduladu, ne’ebé realiza husi Ajénsia Nasionál Planeamentu, Monitorizasaun no Avaliasaun (ANAPMA), partisipa iha semináriu ne’e mai husi parseiru dezenvolvimentu, liña ministériu, ajénsia autonomu inklui autoridade munisipál sira.
26/09/2022, Salaun Auditóriu Xanana Gusmão Ministériu Finanças, Diretur Servisu Korporativus ANC Sr. Julião Soares dos Reis ho Diretora Finansas Sra. Georgina E. da Silva Garcia, partisipa iha semináriu monitorizasaun no avaliasaun ne’ebé Ajénsia Nasionál Planeamentu, Monitorizasaun no Avaliasaun (ANAPMA).
05-07/09/2022, Incheon, Repúblika Koreia – Regulador tékniku ANC Sr. Fábio de Magalhães partisipa iha Lansamentu Rejionál Programa Kapasitasaun kona-ba TIK Fronteira ba Dezenvolvimentu Sustentável, ne'ebé organiza husi APCICT/ESCAP no Ministériu Siénsia no TIK Koreia, ho foku ba Intelijénsia Artifisiál, Blockchain no Internet of Things.
27/09/2022, Eng. Fábio de Magalhães, nudar Tékniku Regulador Professional ANC no akompanha husi Diretur Tékniku Regulador ANC, Sr. Vidal dos Santos Gomes no funcionarius Tékniku ANC, aprezenta Relatoriu Informasaun kona-ba Teknologia, Informasaun e Komunikasaun ba reprezentante husi JICA, molok Eng. Fábio de Magalhães ba partisipa iha treinamentu "ICT Core Personnel Development (C): IT Architect" iha Okinawa-Japaun husi loron 05 Outubru to'o 24 Novembru 2022.
25/08/2022, Salaun enkontru ANC, Estudante Universitáriu Dili Institute of Technology (DIT) halo vizita kortezia ba ANC no simu direta husi ezekutivu sira, iha vizita ne’e ho objetivu atu hatene informasaun no papel ANC nian. Nune’e Diretur Servisu Korporativus Sr. Julião Soares dos Reis halo aprezentasaun kona ba knár no responsabilidade ANC tuir dekretu lei Nú.15/2012, 28 Marsu ne’ebé sai hanesan informasaun adekuadu no referénsia ba estudante sira hodi bele habelar liu tan informasaun hirak ne’e ba públiku iha setor telekomunikasaun.
