Refere ba enkontru konsulta entre Regulador no Fornesedór Servisu (Timor Telecom S.A., TELIN Timor-Leste S.A., Viettel Timor-Leste, Unipessoal, Lda) ne'ebé hala'o iha ANC iha loron 23/10/2020, kona-ba Diploma Ministeriál Ministru Transporte no Komunikasaun n.º 04/2020, loron 23 Setembru 2020, atu uza espektru rádiu-frekuénsia ho máximu iha Timor-Leste.
Tuir orientasaun polítika foun no hanoin husi operadór móvel sira iha enkontru ne'e, ANC aprova alterasaun atu hanaruk Konvite ba Aplikasaun Espektru iha banda 2600 MHz hodi inklui mós banda 1800 MHz no 2300 MHz.
Tanba ne'e, ANC konvida operadór móvel hotu atu hatama aplikasaun, ka hadi'a/konfirma sira-nia aplikasaun, ba atribuisaun espektru iha banda 1800 MHz, 2300 MHz no 2600 MHz tuir Konvite ne'ebé revee ona.
Hodi fó sai espektru iha banda 1800 MHz, 2300 MHz no 2600 MHz, ANC iha objetivu sira tuir mai:
- Apoia implementasaun polítika Governu nian;
- Responde ba nesesidade operadór móvel sira, liuliu iha área urbana, atu fó servisu dadus di'ak liu ba sira-nia kliente;
- Promove uza espektru rádiu-frekuénsia ho efisiénsia;
- Promove kompetisaun iha setór;
ANC iha direitu atu kansela ka hasai tempu ba atribuisaun ne'e, parte ka tomak, la presiza fó razaun, atu proteje objetivu sira iha leten, tanba Governu mak iha poder úniku atu deside prioridade objetivu ida-idak no se atribuisaun espektru ne'e atinje objetivu sira ho di'ak.
Ema ne'ebé interese bele kontaktu ANC atu hetan informasaun tan.
