Díli, 09 Fevereiru 2026 – Prezidente Konsellu Administrasaun ANC, I.P., Sr. Flávio Cardoso Neves, hamutuk ho Diretór Tékniku, Sr. Novelino dos Santos, fó ofisialmente Sertifikadu Rejistu (Lisensa) ba empreza Fornesedór Servisu Internet (ISP) Vanov Technology Unipessoal, Lda., iha serimónia formál iha sala enkontru ANC, Caicoli, Díli.
Iha serimónia ne'e, Prezidente ANC hatete katak Timor-Leste uza kuadru regulatóriu telekomunikasaun ne'ebé liberalizadu, ne'ebé fó oportunidade ba entidade hotu ne'ebé interese atu investe iha setór, ho kondisaun katak sira kumpre rekizitu regulatóriu, kondisaun lisensa no prosedimentu ne'ebé ANC estabelese.
Nia mós hatete katak tama husi ISP Vanov Technology Unipessoal, Lda. ba merkadu sei hadi'a kualidade servisu no hametin konfiansa konsumidór, liuhusi fó servisu Internet ne'ebé fiável no tuir regra.
Nia mós subliña katak lisensa ISP lori obrigasaun regulatóriu no responsabilidade operasionál. Empreza tenke asegura kualidade servisu (QoS), mantein prontidaun téknika, kumpre padraun regulatóriu nasionál, no promove interkoneksaun no kooperasaun ho operadór lisensiadu sira seluk atu asegura konetividade rede no servisu ne'ebé di'ak. Ida-ne'e importante liuliu tanba Governu halo ona investimentu estratéjiku boot ba transformasaun dijitál, inklui kabu submarinu ne'ebé liga Timor-Leste ba rede internasionál.
Hanoin fali katak, molok ida-ne'e, ANC fó ona sertifikadu rejistu ba empreza ISP hamutuk sanulu-resin-neen (16) ne'ebé opera iha Timor-Leste.
Partisipa mós iha serimónia ne'e Koordenadór Jerál Asuntu Administrativu, Sr. Adelino Pires Amaral, Koordenadór Tékniku, Eng. Pio Soares, no funsionáriu tékniku husi Divizaun Lisensiamentu.
