Autoridade Nacional de Comunicações (ANC) aprezenta workshop Asia Pacific Network Information Centre (APNIC) kona-ba Seguransa Rede no Roteamentu Avansadu, iha loron 12 to'o 16 Agostu 2019, iha Sala Konferénsia Ministériu Transporte no Komunikasaun (MTK), Avenida Xavier do Amaral, Díli, Timor-Leste.
Network Security
Objetivu workshop ne'e mak atu estuda konseitu, protokolu no polítika prinsipál atu harii no mantein seguransa rede ida, no komprende oinsá sira funsiona. Workshop haree seguransa ekipamentu no infraestrutura rede iha kamada oioin, atu harii rede ida ne'ebé forte, estável no seguru, no proteje dadus no prosesu sira iha rede.
Workshop mós haree natureza no estrutura atake ba rede no motivu ne'ebé dudu atividade maliciozu online sira ne'e.
Kursu ne'e mós estuda asaun no prosesu atu identifika, hamenus no responde ba atake sira ne'e.
Advanced Routing
Workshop tékniku ne'e iha lisaun no exersísiu prátiku iha laboratóriu atu hanorin oinsá dezeña infraestrutura roteamentu, klasifikasaun no oinsá hili protokolu roteamentu, prinsípiu arkitetura roteamentu Internet, OSPF, BGP, enjeñaria tráfiku BGP no ferramenta eskala (Local Pref, MED, AS path prepend, communities, route reflector, peer group, etc.). Aprezentasaun sira esplika detalle oinsá protokolu sira funsiona no prátika di'ak liu iha indústria, ba rede operadór no rede empreza.
Kursu ne'e mós iha servisu prátiku barak ho IPv4 no IPv6 no komandu konfigurasaun router Cisco IOS.
