Asembleia Mundiál Padronizasaun Telekomunikasaun (WTSA) 2024, ne'ebé hala'o iha Nova Delhi, Índia, husi 14 to'o 24 Outubru, hatudu futuru telekomunikasaun mundiál. WTSA organiza husi União Internasionál Telekomunikasaun (ITU) kada tinan haat, no define padraun internasionál telekomunikasaun no promove diálogu kona-ba tendénsia prinsipál iha setór teknolojia informasaun no komunikasaun (TIK).
Asembleia tinan ne'e bate rekorde partisipasaun, ho delegadu liu 3.300 husi governu, setór privadu, instituisaun peskiza no akademia, inklui ministru 36.
Delegada Sra. Carmelita Soi Tolentino no Sra. Agostinha Bernardina Soares reprezenta Autoridade Nasionál Komunikasaun Timor-Leste iha eventu importante ne'e. WTSA 2024 fó oportunidade ba ema ne'ebé halo polítika, espesialista no líder indústria atu haree progresu Setór Padronizasaun Telekomunikasaun ITU nian (ITU-T), diskute teknolojia foun no define prioridade ba tinan haat tuir mai. Tópiku prinsipál sira mak rede jerasaun foun (5G no 6G), seguransa sibernétika, intelijénsia artifisiál, inkluzaun dijitál, sustentabilidade no papél TIK nian atu atinje Objetivu Dezenvolvimentu Sustentável (ODS) Nasoins Unidas nian.
Eventu ne'e mós iha inisiativa paralela hanesan Network of Women (NoW), ne'ebé foka ba igualdade jéneru no inkluzaun iha setór telekomunikasaun, apoia partisipasaun feto iha pozisaun lideransa no promove balansu jéneru iha indústria. Aleinde ne'e, ITU Kaleidoscope eventu (21–23 Outubru) hatudu teknolojia no peskiza inovativu. Iha loron 24 Outubru, partisipante WTSA sira selebra UN Day, hodi hanoin kona-ba papél telekomunikasaun nian atu atinje ODS no mundu ida ne'ebé liga liu no justu liu.
Lisaun pesoál no institusionál husi WTSA 2024
Personal Perspective: Partisipasaun iha WTSA 2024 iha valór boot tebes, tanba ami bele ko'alia ho espesialista no líder husi mundu tomak. Diskusaun no workshop kona-ba teknolojia foun hanesan 6G, IA no IoT hatudu sira-nia potensiál atu muda telekomunikasaun. Ne'ebé fó inspirasaun liu mak NoW inisiativa, ne'ebé fó mentoria no rede kontaktu atu apoia feto iha teknolojia. Liuhusi NoW ami bele liga ho profisionál sira ho hanoin hanesan no aprende husi líder feto sira iha setór TIK.
Institutional Perspective: Husi lado institusionál, WTSA 2024 hatudu importánsia atu aliña regulamentu nasionál ho padraun internasionál telekomunikasaun. Aliñamentu ne'e ajuda sistema sira servisu hamutuk (interoperabilidade) no hatuun kustu, ne'ebé importante liuliu ba nasaun dezenvolvimentu ne'ebé hakarak hametin sira-nia ekonomia dijitál. Eventu ne'e mós loke dalan kontaktu ho parte interesada internasionál, promove kolaborasaun, transferénsia teknolojia no oportunidade investimentu ne'ebé esensiál atu hadi'a infraestrutura telekomunikasaun no konetividade globál.
