Press Release
Díli, 25.11.2021 – ANC fó ona indikativu chamada (call-sign) estasaun ró dahuluk ba Berlin Nakroma, ró nasionál dahuluk Timor-Leste nian ne'ebé lori pasajeiru entre Díli, Ataúru no Oe-Cusse/RAEOA.
Call-sign foun Berlin Nakroma nian mak 4WBN2. Call-sign ne'e uza iha ekipamentu radiokomunikasaun ró nian hamutuk ho Identidade Servisu Móvel Marítimu (MMSI). Antes ne'e, ANC fó ona ba Berlin Nakroma númeru MMSI 550011111.
Call-sign ne'e hasa'e seguransa operasionál ró nian. Ró ne'ebé kumpre Konvensaun Internasionál ba Seguransa Moris iha Tasi tenke iha sistema radiokomunikasaun automátiku, inklui Digital Selective Calling (DSC) no/ka ekipamentu alerta husi sistema globál ba perigu no seguransa marítima (GMDSS). Tuir rekomendasaun ITU, estasaun ró ne'ebé uza ekipamentu DSC tenke uza sira-nia MMSI no call-sign.
Tanba ró sira baibain komunika liuhusi rádiu VHF, call-sign uza hanesan identifikadór úniku aleinde númeru MMSI. Call-sign ne'e atu identifika ró, tanba dalaruma naran ró sira besik malu ka hanesan, maibé call-sign úniku no ajuda hatene komunikasaun rádiu ne'e mai husi ró ida-ne'ebé.
Ikus liu, atu asegura kompatibilidade ho GMDSS, númeru, naran no enderesu estasaun ró ne'ebé partisipa iha servisu telekomunikasaun internasionál tenke disponível ba entidade autorizada hotu. Tanba ne'e, ANC notifika ona ITU kona-ba call-sign no MMSI Berlin Nakroma nian. Sira rejistu ona iha Administrasaun Timor-Leste no bele asesu iha mundu tomak liuhusi base dadus ITU iha: https://www.itu.int/mmsapp/ShipStation/list.
Joao O. Freitas
Prezidente
