Seminariu no workshop ANC dala-haat kona-ba Seguransa Sibernétika Nasionál hala'o iha loron 4–8 Fevereiru 2019 iha Díli. Objetivu husi seminariu sira-ne'e mak atu hasa'e konxiénsia kona-ba importánsia seguransa sibernétika iha setór públiku, ho tópiku ne'ebé hasa'e kapasidade instituisaun públika sira ne'ebé involve iha Ekipa Resposta ba Insidente Seguransa Komputadór Timor-Leste (TLCSIRT).
Tema seminariu ne'e mak "Harii Ekosistema Nasionál ne'ebé Reziliente no Seguru" no workshop foka ba "Protesaun Infraestrutura Informasaun Krítiku no Protesaun Dadus". Eventu ne'e iha orador no formadór na'in-lima husi ID-SIRTII/BSSN Indonézia no PENS.
Seminariu ne'e hetan partisipante na'in-112, inklui reprezentante husi ajénsia públika, setór privadu (inklui operadór telekomunikasaun boot sira), akademia no komunidade TIK. Workshop fó formasaun espesífiku ba partisipante na'in-36 husi parte interesada TLCSIRT nian, inklui reprezentante ajénsia públika (Ministériu Prezidénsia Konsellu Ministrus, Ministériu Justisa, Ministériu Finansas, Banku Sentrál, TIC Timor, I.P., KAK no ANC) no estudante no funsionáriu balun husi UNTL, DIT, IOB no UNDIL.
ANC hato'o agradesimentu ba JICA tanba ninia apoiu ba eventu ne'e. JICA no ANC servisu hamutuk dezde 2016 atu harii no hametin TL-CSIRT.
